თამუნა ლეკვეიშვილი: "მრცხვენია, როცა მამამთილი მეძავის როლში მხედავს"

"კომედი შოუს" მსახიობმა თამუნა ლეკვეიშვილმა გათხოვების მერე სრულად გამოავლინა თავისი სიყოჩაღე. ორი შვილი თითქმის მიყოლებით გააჩინა, მაგრამ შოუ დიდიხნით არ მიუტოვებია, ეკრანზე მალე დაბრუნდა. ახლა დიასახლისობასაც ასწრებს და დატვირთულ სატელევიზიო რეჟიმში მუშაობასაც. მუდმივად მაყურებლის წინაშე ყოფნა, რა თქმა უნდა, გარკვეულ მსხვერპლს მოითხოვს, მაგალითად, თამუნასაც დასჭირდა საახალწლო კონცერტებისთვის "მომაკვდინებელ" დიეტაზე დაჯდომა. ინტერნეტი აჭრელებულია მისი ძველი და ახალი ფოტოებით, ყველას აინტერესებს, როგორ დაიკლო წონაში. საუბარი ჩვენც ამ თემით დავიწყეთ.
თამუნა ლეკვეიშვილი:
– მე, პირადად, ვერ გეტყვით, რომ წონაში ძალიან დავიკელი, ასე არ არის. საახალწლოდ კონცერტებისთვის სამკვირიანი დიეტა "თავის მოკვლა" გავაკეთე და იმ შედეგს მივაღწიე, რომ სცენაზე გამხდარი დავდექი, მაგრამ ახალ წლებზე ისევ მოვიმატე. დიეტოლოგთან არ დავდივარ, რომ დავარღვიო, მეორედ მისვლა შემრცხვება და აზრი არ აქვს. ამიტომ დიეტებს თვითონ ვიგონებ და წონაში უფრო კარგადაც ვიკლებ.
– მუშაობა, ოჯახის მოვლა დიდი ჯაფაა და ამას დამატებულ შიმშილობას როგორ უძლებთ?
– დიეტის გრაფიკს სამსახურის სამუშაო რეჟიმიდან გამომდინარე ვადგენ. სახლში დიეტის დაცვა არ გამომდის, შაბათ–კვირას ძირითადად ვჭამ.
– ორი პატარა შვილის დედისთვის რთული არ არის, სამსახურშიც ყოველდღე იაროთ და დრო ოჯახსაც დაუთმოთ?
– ჩემს საქმეში აქტიური რომ ვიყო, ამაში ბავშვების ძიძა და დედაჩემი მეხმარებიან, მათ ხარჯზე ყველაფერი კარგად გამომდის. ნინი მალე 3 წლის გახდება, ნიკოლოზი ჯერ პატარაა, წლინახევრის. გოგო გამართულად ლაპარაკობს და სახლიდან რომ გამოვდივარ, კარში დგება, მეხვეწება, არ წახვიდეო. რაღაცეებს ვპირდები და ასე ვეპარები, ფაქტობრივად, ვატყუებ. შაბათ–კვირა ძირითადად თავისუფალი მაქვს და სასეირნოდ ბომბორას პარკში გავდივართ ხოლმე.
– თქვენი ოჯახით ცალკე ცხოვრობთ თუ ქმრის მშობლებთან?
– ცალკე ცხოვრება გამოდის, რადგან მამამთილი ძირითადად გასულია. სამწუხაროდ, დედამთილი არ მყავს, სანამ გიგის გავყვებოდი ცოლად, 4 თვით ადრე გარდაიცვალა.
– მამამთილებს რძლები უყვართ, თქვენ როგორი ურთიერთობა გაქვთ?
– ხშირად მეუბნება, რომ მე ვარ მისი შვილი და გიგი – მისი სიძე. ამით ალბათ ყველაფერი ნათქვამია.

– სკეტჩებშიც მოსწონს თქვენი როლები?
– მიუხედავად იმისა, რომ ძალიან ვუყვარვარ და ჩემს საქმიანობასაც დადებითად აფასებს, როცა "კომედი შოუ" იწყება და ვიცი, რომ რომელიმე სკეტჩში მეძავის როლში ვარ, ტელევიზორის საყურებლად მამამთილთან ერთად არ ვჯდები. ზოგჯერ სხვა არხზე გადავრთავ ხოლმე, რადგან მისი თანდასწრებით ამ ყველაფრის ყურება ცოტა უხერხულია.
– ქმრის არ გერიდებათ? რას გეუბნებათ გიგი?
ამ შეკითხვის დროს ოთახში წამიერად მიშა ანდღულაძემ შემოიქროლა და ინტერვიუში ჩაგვეჭრა:
მიშა: თამუნას კი არა, ის იკითხეთ, მე რას მეუბნება ჩემი ცოლი, ძუძუები რომ მაქვს ამოსული!
თამუნა: ხომ ხედავთ, მე უკეთეს დღეში ვარ, ვიდრე მიშა! გიგი არაფერს მეუბნება, ამ ყველაფერს ისე აფასებს, როგორც როლს. ჩემს თამაშს ისე იღებს, როგორც განვითარებული და ცივილიზებული ადამიანი, ეცინება ხოლმე. სულ დაკავებული რომ ვარ, შეიძლება მებუზღუნოს კიდეც, მაგრამ იცის, რომ ასე უნდა იყოს და ვერაფერს შევცვლი. გიგის დედა, მანანა ეგაძე, კონსერვატორიის პროფესორი იყო, მასაც სულ დროის დეფიციტი ჰქონდა და გიგისთვის ჩემი დროის უქონლობა პრობლემას არ უნდა წარმოადგენდეს. ზედმეტს არც არაფერს ამბობს.
– გიგი თქვენი აქტიური მაყურებელია?
– უფრო მეტად "ვანოს შოუს" უყურებს, ვიდრე "კომედი შოუს", თუმცა თუ რაიმე განსაკუთრებული სკეტჩია ან მე რაღაც განსხვავებულს ვაკეთებ, მაინც ვაყურებინებ ხოლმე.
– როგორც ვიცი, თქვენი მეუღლეც, გიგი ოქროპირიძე, თქვენი კოლეგაა, მუსიკოსია. რას საქმიანობს?
– ნიკა მემანიშვილის სიმფონიურ ორკესტრში უკრავდა, მაგრამ ერთფეროვნება იმდენად არ უყვარს, რომ წამოვიდა. თქვა, ორკესტრში დაკვრა და სულ ერთი და იმავეს კეთება არ შემიძლიაო. გიგის თავისი ბარი აქვს, სადაც მუსიკალურ მხარეს თვითონ აგვარებს. სხვათა შორის, რამდენიმე სიმღერა ერთად ჩავწერეთ და რადიოშიც ტრიალებს. დიდად ცნობილი სიმღერები არ არის, რადგან პრეზენტაციები და წარდგენები არ გაგვიკეთებია. ამას არც მომავალში ვაპირებთ, სიმღერებს კი კიდევ ჩავწერთ. გიგი ძალიან კარგი მუსიკოსია.
– როგორი მამაა?
– ერთ მაგალითს მოგიყვებით. გადაცემის ჩაწერაზე ვიჯექი. ტელეფონის ზარი გათიშული მქონდა. დავხედე და თურმე გიგი მირეკავდა. როგორც კი შესვენება დაიწყო, მაშინვე დავურეკე, ვკითხე, რა ხდება–მეთქი. თურმე ბავშვის საყიდლებზე წაყვანა მოინდომა, ერთ–ერთ მაღაზიაში შეიყვანა და ვერც ერთი ფეხსაცმელი მოარგო. ჩხუბი დამიწყო, რამხელა ფეხები აქვს, არაფერი ეკვრებაო. ბუთქუნა ფეხები აქვს და რა ჩემი ბრალია? ტელეფონი გავუთიშე და ცოტა ხანში ისევ დამირეკა, მკითხა, ჟაკეტი თუ ვუყიდოო. აი, ასე შემოსა ბავშვი და ბომბორაზე სასეირნოდ წაიყვანა.
– საოჯახო საქმეებშიც ასე გეხმარებათ?
– სამზარეულოში საერთოდ არ უნდა შეუშვა, ვერ იტანს. ამ კუთხით ტიპური ქართველი მამაკაცია. ხანდახან ბავშვებს ვუტოვებ, ოღონდ კონკრეტული დროით, თორემ თუ გადავაცილე, მერე ცუდად არის საქმე, ატყდება ტელეფონზე რეკვები...
– თქვენი ქმრისგან განსხვავებით, საკმაოდ დიდი ხანია ერთი ჯგუფის წევრი ხართ და ეს საქმიანობა თქვენთვის მოსაბეზრებელი არ გამხდარა. ამას როგორ ახერხებთ?
– საინტერესო გარემოს თვითონვე ვიქმნით. როგორც ხალხს სჭირდება სიახლის მიწოდება, ჩვენც იგივე მოთხოვნილება გვაქვს. სულ ერთსა და იმავეს რომ ვტკეპნიდეთ, ახალი პერსონაჟები და ახალი სიტუაციები არ იქმნებოდეს, ჩვენც მოგვბეზრდებოდა. ჯერჯერობით პერსონაჟებისა და სიტუაციის ცვლას კარგად ვახერხებთ. ახალი სახეებიც გვემატებიან, ზოგი მიდის, ზოგიც მოდის, ასე რომ, სულ განახლების პროცესში ვართ. ჩვენთან ყველა იმდენად კომუნიკაბელურია, ურთიერთობის პრობლემა არავისთან გვაქვს. ახალ მსახიობს მალე ვიღებთ, თუ, რა თქმა უნდა, ისიც ცოტა ჩვენნაირია და ამის საშუალებას გვაძლევს.
– კონკრეტულად რა მონაცემები უნდა ჰქონდეს ახალ მსახიობს, რომ თქვენს გუნდში მიიღოთ?
– პირველ რიგში, არამხოლოდ მსახიობური მონაცემები უნდა ჰქონდეს, სცენარის წერაც უნდა შეეძლოს. გადაცემისთვის სცენარებს ყველა ერთობლივად ვწერთ. უფრო სწორად, სცენარის დაწერას გოგოები ვცდილობთ და ბიჭებს კარგად გამოსდით. ჩვენს მსახიობს ადამიანებთან ურთიერთობის პრობლემა არ უნდა ჰქონდეს და იუმორი კარგად უნდა ესმოდეს, რომ, "შუტკა" რატომ არის სასაცილო, ამის ახსნა არ დაგვჭირდეს.
– თქვენი შესრულებული როლებიდან ყველაზე მეტად რომელია თქვენთან ახლოს?
– ჩემი სკეტჩებიდან მუსიკალური როლები უფრო მომწონს, ვიდრე სხვა პერსონაჟი. მე და მიშას როკჯგუფი "ჰოთ კომპოტი" გვაქვს, სადაც სასწაულ ხმაზე ვმღერი, ვკივი და იმდენად კარგი გამოხმაურება გვაქვს, კლიპის გადაღებასაც ვაპირებთ.
– სკეტჩების ჩაწერაზე თავს როგორ იკავებთ, რომ არ გაგეცინოთ?
– რეპეტიციებზე სიცილს ბოლომდე ვილევთ, რომ ჩაწერაზე ისტერიკები არ დაგვემართოს. მიშასაც და სხვა მსახიობებსაც ძალიან უყვართ გადაღების დროს იმპროვიზაციები, რაც ძალიან მომწონს. ერთი სკეტჩი გვაქვს, სადაც სამი გოგო ვმონაწილეობთ. თათია სულუაშვილის პერსონაჟს შეყვარებული სცემს, დანარჩენები კი ვამშვიდებთ. ამ სკეტჩში თათიას იმდენი იმპროვიზაცია ჰქონდა, ჩაწერამდე ძლივს მივაღწიეთ, ვერ გეტყვით, სიცილით რა გვემართებოდა. რაღაც ძველი რეპი გაიხსენა, დაუგეგმავად იმღერა და იცეკვა.
– ყველაზე ბევრი დუბლის გადაღება ვის გამო გიწევთ?
– ვასო ფხაკაძე სიცილს ვერასდროს იკავებს. ბევრი დუბლი სჭირდება, რომ დაწყნარდეს და აღარ გაეცინოს. ამას წინათ ძაღლი დაკარგა და გლოვობდა, წაშლილი სახით მოვიდა. გადაცემა "შუადღეშიც" კი დაჯდა და ქვეყანას ამცნო, ძაღლი დავკარგეო. მერე მთელი თბილისი რეკავდა, ვასოს ძაღლს რა ბედი ეწიაო. საბედნიეროდ, იპოვა.
სოფიო ბოჭორიძე